شيف : ياسمين احمد

لو عايزة ريحة أكلك تبقي مفحفحة وبطعم أكل امهاتنا زمان ويبقي خفيف على المعدة في الحر جربي الطريقة دي وادعيلي

لما بطبخ كوسة أو باميه أو فاصوليا أو أى خضار بحمر البصل وانزل بالخضار اى نوع وأضيف ملح وبهارات وفلفل اسود وبابريكا وأشوح الخضار مع البصلة…. الخضار بياخد من طعم البصل بيبقى تحفة وبعدين انزل بعصير الطماطم ونص معلقة صغيرة سكر وأسيبه يستوى على ناااار هاديه ولو احتاج شوربة بزوده
وقبل ما اقفل الناااار بخمس دقايق بضيف فص ثوم مفروم
يغلى مع الخضار بيخلى الريحه مفحفه كده وبيبقى تحفه
ومش بضيف ثوم فى البدايه مع البصل بكتفي بفص واحد فى الأخر كأنك حطيتى رأس ثوم والخطوة دى مفيدة للناس
اللى بتعانى من القولون ومش بتقدر تضيف كمية كبيرة من الثوم
علشان متعمليش طشه أخيرة للباميه مثلا وتبقى فيها كمية
كبيرة من الدهون كفايه كمية السمنة اللى حمرنا فيها البصل ومش هنعمل طشة ثوم فى اخر الطبخة وتبقى كلها سمنة
والثوم لو ضفناه من البدايه مع البصل ريحته بتروح فالأفضل نضيفه فى الأخر
والطريقة دى فى الطبيخ احسن وأخف من الطبيخ المتسبك