شيف: ياسمين احمد

مقادير الكفتة
نص كيلو لحمة مفرومة فيه نسبة من الدهون
٢ بصلة مبشورة (رشة ملح عليهم ونستنى تنزل مايتها بناخد التفل بس) ونخلي مياه البصل علي جمب هاقولك نعمل بيها ايه
ملح – فلفل أسود – بهارات كفتة
بابريكا توم وبصل بودر
ملعقة صغيرة بيكنج بودر
معلقة ك نشا
ربع كوب بقدونس
مقادير الصوص
معلقة ص توم مهروس
معلقتين صلصلة
طماطمية مبشورة
فلفل الوان وفلفل حامي
طريقة التحضير
هنعجن اللحمة المفرومة مع البصل والتوابل والبيكنج بودر والنشا والبقدونس كويس جدا ونعجن فيها لما كل المكونات تتجانس مع بعض وتتصمغ مع بعض كويس بعد كده نصبعها أو نعملها كور حسب رغبتك ونسيبها ترتاح شوية في التلاجة
سخني طاسة كبيرة على النار، حطي فيها الكفتة من غير مادة دهنية خالص الكفتة هتنزل الدهون اللي فيها
وشوحيها لحد ما تاخد لون حلو من كل الجوانب وبعدها شيليها على جنب
وفي نفس الطاسة انزلّي بمعلقة توم مهرووس وشوحها لما لونها يصفر وبعد كده انزلي بالفلفل وقلبيهم مع بعض وضيفي معلقتين صلصلة وهاتي الطماطمية المبشورة وحطي عليها مياه البصل وملح وفلفل اسود ورشة من السكر وكمان معلقتين كبار من دبس الرومان واغطهيم واسيبهم يتسبكوا خمس دقائق علي نار هادية وبعد كده
رجّعي الكفتة عليهم وسيبيهم مع بعض شوية
والنار هادية علشان الكفتة تشرب من طعم كل المكونات وأطفي وبس كده
وقدميها مع عيش طري أو أرز أبيض واستمتعي بأحلى كفتة مدلعة مفيش زيها بصوص خطييير
وبالف هنا🥰