شيف : ياسمين احمد


هنعمل كميه من بانيه الشركات وهنفرزها بالطريقه الصح وتفضل معانا بالشهور كانها فريش
من غير سعرها الغالي وهتطلع احلي وكلها قرررررمشه
المكونات
ك صدور فراخ مخليه او بانيه
تتغسل وتتصفي تمام وتتقطع وتتفرم ناعم ف الكبه ونشيل اي عروق منها
نسيبها ترتاح ف التلاجه
ناخد لمقدار الكيلو ٣ رغيف فينو وسط نشيل القشره بتاعته ومن غير مانحمصه خالص وحتي لو بايت ينفع جدا ونطحنه ناعم بيعمله حوالي كوب
هنحتاج كيس من الفيجيتار الجاهز من العطار او الماركت
طب لو مش متوفره ولا يهمك حااااالا تاخدي التوابل دي من البيت ونعملها احلي وبتكون عباره عن معلقه صغننه من معالق التوابل
ثوم بودره
بصل بودره
فلفل اسمر
شطه
بابريكا
مرقه فراخ بودره
زنجبيل بودره
ملح
معلقه ك نشا
نص معلقه بيكنج بودر
نضيف تحبيشه التوابل دي ع الصدور المفرومه ونفرمهم ف الكبه حوالي ٥ ق
نسيبهم ف الثلاجه لحد مانخلص الخطوه اللي جايه
نجهز الككفر الخارجي المقرمش للبانيه
فيه كرسبي دجاج عند العطار بيكون لونه اصفر هنفرمه نص فرمه عشان بيكون خشن وبيكون لونه اصفر حلو
نضيف عليه نفس مكونات التوابل اللي ضيفناها للصدورونزود كمان نص معلقه كركم ومعلقه نشا ونقلبهم مع بعض
هناخد الصدور المفرومه ونشكلها نفس شكل البانيه العادي او الجاهز وتكون بسُمك سم واحد
هقولك طريقه التشكيل بتاخدي كوره وتشكليها كانها صباع كفته وبعدين نضغط خفيف لحد مايبقي شكله بيضاوي ونساوي الحروف هيطلع شكل شريحه البانيه ويكون سُمكها مش اكتر من سم واحد
نشكل الكميه كلها مره واحده ف صينيه فيها طبقه من اكياس الثلاجه
وخلصوا الكميه كلها وبعدين ناخد قطعه قطعه ونغلفها بالكرسبي دجاج الاصفر المتبل ونرجعه الصينيه تاني حوالي ساعه او اكتر يتجمد
ودي خطوه مهمه وهي سر نجاح التفريز من غير ماتفك وقت القلي
بعد ماتتجمد تقدروا تحفظوها ف اكياس علي بعض عادي مش هيلزقوا خلاص عشان جمدناها قبل مانحفظها
ونشيلها ف الفريزر من ٣ ل ٤ شهور
وقت التسويه
هنخرجها من الفريزر ونسيبها حوالي ربع ل نص ساعه بحراره المطبخ ونسخن الزيت ونقليها وبلاش تملوا الطاسه علشان تفضل مقرمشه
تابعوها تاخد لون حلو من كل ناحيه
تجنن ومقرمشه وريحتها وقت القلي رهييييبه
اعملوها للغدا للعشا ولجوع اي وقت
ل ساندوتشات المصايف والمدارس ووقت التمرين
وبالف هنا🥰