كتب: محمد صالح

اللي حصل مع الطفل محمد وليد مأساة تخلي الحجر يدمع.. طفل بريء نازل من بيته يجيب طلب بسيط لمامته، لقى نفسه قدام بلطجي طالع يتخانق في الشارع وهو ماسك فرد خرطوش.
في لحظة واحدة، الرصاص طار واخترق جسم محمد اللي لا ليه ذنب ولا خطيّة.

أكتر من 50 رشة خرطوش استقرت في جسمه.. استأصلوا له الطحال، وعمل عمليات تدبيس للمعدة، ولسه ذراعه مهدد بالبتر 💔..
طفل كان المفروض يعيش طفولته زي باقي العيال، النهاردة بيصارع الألم على سرير المستشفى.

أبوه وأمه عايشين في كابوس، والدموع مش بتفارقهم، وكل اللي بيقولوه:
“المجرم لازم يتحاسب”.

الناس كلها دلوقتي بتدعي لمحمد يقوم بالسلامة، وبتدعي لوالديه ربنا يصبّر قلوبهم.. عشان اللي حصل مش حادثة عادية، دي جريمة كسرت قلب كل بيت عرف قصته.